Sleepless in KSA
يعني ألحين أبغى أفهم ، من صباح ربنا ، الكل نايم و أنا الوحيدة الصاحية ليه!!!
أنام متأخر ومافيه فايدة ، سبع ونص صاحية اتأمل السقف 
من عطلت ما نمت نومة زي الناس، إذا ما هاجمتني الكوابيس ، زارني الأرق ، ياخي وش ذا!!!
أبي أنااااااااااااااام
نفسي بإجازة سعودية ، أسهر طول الليل و أنام طول النهار
نفسي مخي يتوقف تماماً تماماً عن التفكير طالما انا بإجازة ، بس مااا يقدر ، متعود ع التعتير 
يمكن لو نمت أصير أشوف الأشياء قدامي بحيوية أكثر ، أروح المجمع ودي أتسوق ، بس أطفش من أول نص ساعة ، و أرجع بس بكيس حلاوة 
غير إني أبي أنام ، أبي كمان أكتب،،
اشتقت اكتب، اشتهيت حرفي، و كذا يا سبحان الله كل الافكار تنصب على دماغي لما احط راسي عالمخدة، لكن أول ما افتح اللاب توب عشان اكتب شي ، كل شي تبخر !!
ما أعرف ليه حرفي تعلق بقلبي ، يعني : منذ أن أعلن قلبي افلاسه، أعلن حرفي اضرابه.. قلبي أبكم و حرفي فقد بريقه ..
طيب حتى لو كلام عادي ، يومي ، مااااااش ، حتى الواجب اللي مررته لي نور ماني قادرة احله لأنه يبي له حكي كثير
ودي حرفي يكون حر ، الكلمات تطلع مني بدون خوف و بدون تردد ، ودي أرجع انطق بدون ما اتذكر أي ألم
على طاري ” أتذكر ” ، أنا ما قلت لكم إني أملك ذاكرة من فولاذ !
ذاكرتي ودي اتخلص منها ، أحد يعرف كيف؟
أتذكر بيتنا القديييييم ، اللي عشت فيه سنة وحدة لما كان عمري أربع سنوات ، و أتذكر الروضة حقتي ، و أتذكر التمارين اللي كنا نعملها
أتذكر البيت اللي نقلنا عليه بعده ، و ما عشت فيه لأني كنت أعيش مع جدتي ، أتذكره بتفاصيله و والدي ما يتذكره
أتذكر أول ابتدائي و كتبي و دفاتري و ملابسي و أكل جدتي .. و اتذكر جدتي تدرسني
أتذكر ثاني ابتدائي و شقاوتي و تعب عمتي معي
أتذكر أسماء الطالبات اللي كانوا معي بأول و ثاني وثالث متوسط و أتذكر اسماء مدراستي كلهم
أتذكر تفاصيل لا يمكن لأحد يتخيل اني اتذكرها ،
فـ كيف اتوقع من حالي أنسى أكبر حدث في حياتي : ما أعرف !
_
كتب بواسطة Hayat • الرابط الثابت • التعليقات (4) • اكتب تعليق »
